Verulega dregur úr lækkunum á íbúðaverði

Íbúðaverð á landinu öllu hefur nú lækkað um 2,7% að nafnverði og 5,7% að raunvirði á landinu öllu frá síðustu áramótum samkvæmt mælingum Hagstofu Íslands. Síðustu 12 mánuði hefur íbúðaverð lækkað um 1% að nafnvirði á landinu öllu en á sama tíma í fyrra nam 12 mánaða lækkun húsnæðis 11%.

Greining Íslandsbanka fjallar um málið í Morgunkorni sínu. Þar segir að þá hafi íbúðaverð á landsbyggðinni hækkað um 3% frá áramótum talið samkvæmt mælingum Hagstofu Íslands. Undanfarna 12 mánuði hefur íbúðaverð á landsbyggðinni hækkað um 8,6% en í september í fyrra hafði það lækkað um 11%. Mikill viðsnúningur hefur því átt sér stað í verðþróun íbúða á landsbyggðinni samkvæmt þessu.

Þá hafa íbúðir í fjölbýli á höfuðborgarsvæðinu lækkað í verði um 3% undanfarna 12 mánuði og íbúðir í sérbýli um 8,8% en fyrir ári síðan höfðu íbúðir í bæði sér-og fjölbýli lækkað um rúm 11% undanfarna 12 mánuði. Af þessu má sjá að verulega hefur nú hægt á verðlækkun íbúðarhúsnæðis sem gæti bent til þess að sú djúpa niðursveifla sem ráðið hefur lofum og lögum á íbúðamarkaði allt frá ársbyrjun 2008 sé nú á undanhaldi og botninn í verðlækkununum íbúðarhúsnæðis gæti verið að nálgast.

Frá því að íbúðaverð náði hápunkti sínum í byrjun árs 2008 hefur það lækkað um 14% að nafnvirði og 35% að raunvirði.

Vísbendingar um veltu á íbúðamarkaði benda í sömu átt, en svo virðist sem skriður sé að komast á þennan markað eftir langvarandi dvala síðustu missera. Haustið hefur farið vel á stað á íbúðamarkaði og á höfuðborgarsvæðinu hafa í september verið gerðir fleiri kaupsamningar um íbúðahúsnæði á viku hverri en sést hefur um langa hríð.