Virkja verður hugmyndaauðgi starfsfólks fyrirtækja

„Fyrirtæki standa almennt ekki frammi fyrir vandamálum á borð við fjárþurrð eða sjóðstreymi heldur skorti á hugmyndum. Þar sem hugmyndir kvikna ekki, þar er vandamál,“ segir Haraldur U. Diego, einn aðstandenda fundar um mikilvægi sköpunargleði á vinnustöðum sem haldinn var síðastliðinn föstudag. Húsfyllir var á fundinum.

Haraldur segir starfsfólk fyrirtækja almennt með ríka sköpunarþörf. Fyrirtækin sem fólkið vinni hjá verði að gera sér grein fyrir því og virkja hana. „Íslendingar gera það almennt ekki,“ segir Haraldur, sem telur almennt skorta þor til að sleppa sköpunargleðinni lausri.

„Það þorir enginn að stíga út fyrir rammann sem við erum í, sérstaklega núna þegar fyrirtæki eru að segja upp starfsfólki. Enginn þorir að vera skapandi og mæta í bleikum sokkum í vinnuna og búa til andrúmsloft frjálsleika og hugmyndaauðgi,“ segir hann og leggur áherslu á að þótt hugmyndir séu sumar hverjar ömurlegar verði að viðra þær. „Þær vaxa kannski við það. Þannig verða hlutirnir til. Sama hver hugmyndin er, hún styrkist alltaf við viðbrögð og gagnrýni.“- jab