Massa: Endaspretturinn verður spennandi

Felipe Massa hjá Ferrrari vann mótið á Spa brautinni árið 2008, sem keppt verður á um næstu helgi og Kimi Raikkönen sem var hjá Ferrari vann mótið í fyrra, en keppir ekki lengur í Formúlu 1. Massa keppti ekki í fyrra vegna meiðsla sem hann hlaut í tímatökum í Ungverjalandi, en heldur mikið upp á brautina. "Við erum í góðum málum og verðum með nýja hluti í bílnum, sem er liður í þróun bílsins. Ég keppti síðast árið 2008 og elska brautina. Það hlakkar alla til að keyra brautina að ég held", sagði Massa í frétt á autosport.com þar sem vitnað er í skrif hans á heimasíðu Ferrari. "Við höfum sýnt að við erum samkeppnisfærir í síðustu mótum, en það er erfitt að spá í stöðuna. Það er lítill munur á milli liða og smávægilegar breytingar í getu á einstökum brautum getur gert gæfumuninn. Við verðum að sjá hvað gerist á fyrstu æfingum til að sjá stöðuna." "Það eru ekki nema sjö mót eftir og endaspretturinn ætti að verða virkilega spennandi, en það þýðir að spennan verður meiri meðal okkar sem keppa. En við höfum verið í þessari stöðu áður og vitum hvernig á að höndla pressuna." "Við þurfum að koma okkur í toppslaginn og ég er mjög einbeittur, eftir að hafa verið í sumarfríi. Ég saknaði þess að keyra ekki keppnisbílinn og get ekki hugsað mér betri vettvang en Spa. Brautin getur verið skemmtileg í rigningu og það hefur oft rignt. Við verðum að mæta öllum mögulegum aðstæðum", sagði Massa.