Björgvin: Ég negldi boltanum í netið

„Þetta voru tvö virkilega góð stig,“ sagði Björgvin Hólmgeirsson, hetja Hauka, eftir leikinn gegn Aftureldingu í kvöld.

Haukar unnu góðan sigur á nýliðunum  22-23 og Björgvin Hólmgeirsson skoraði sigurmarkið þegar nokkrar sekúndur voru eftir af leiknum.

,,Það verður gríðarlega erfitt fyrir lið að koma hingað og ná í stig. Við spiluðum langar og skynsamar sóknir og náðum að koma boltanum í netið á réttum augnablikum. Í lokin var bara stillt upp í ákveðið kerfi þar sem ég átti að skjóta og ég negldi boltanum í netið. Þetta var frábær sigur fyrir okkur eftir að hafa drullað  vel á okkur í síðustu umferð,“ sagði Björgvin.

„Þetta var ekki mikill handbolti hér í kvöld heldur bara gríðarleg barátta milli manna. Mér fannst dómararnir missa aðeins tökin á leiknum hérna í lokin og eru að gefa okkur allt of ódýrar tvær mínútur. Við náðum  samt að komast í gegnum þetta og unnum sanngjarnt,“ sagði Björgvin Hólmgeirsson kampakátur eftir leikinn.