Tæplega 3.000 biðja um endurútreiking gjaldeyrislána

Tæplega 3.000 viðskiptavina Íslandsbanka hafa nú þegar sent beiðni um endurútreikning. Viðskiptavinir geta valið hvort inneign hjá Íslandsbanka sé endurgreidd eða lögð inná höfuðstól láns. Meirihluti viðskiptavina velur að láta inneign ganga inná höfuðstól lánsins.

Þetta kemur fram í tilkynningu frá Íslandsbanka en þann 1. október síðastliðinn opnaði Íslandsbanki Fjármögnun fyrir endurútreikninga á hluta af bílalánum, bílasamningum og kaupleigusamningum í erlendri mynt, rúmum 2 vikum eftir úrskurð Hæstaréttar um vaxtaþátt slíkra lána.

Viðskiptavinir sem hafa verið greiðendur á láni frá útgáfudegi hafa síðan þá getað skoðað stöðu lánsins á vefsvæði Íslandsbanka, www.islandsbanki.is/fjarmogun og gengið frá beiðni um endurútreikning. Þeir viðskiptavinir sem hafa ofgreitt til Íslandsbanka Fjármögnunar á lánstíma og eiga rétt á endurgreiðslu, geta valið um að láta upphæðina ganga inná höfuðstól lánsins eða fá hana greidda inn á reikning.

Um rúmlega 7.000 lán er að ræða í þessum fyrsta áfanga. Endurútreikningarnir hafa fengið mjög góðar viðtökur frá viðskiptavinum og nú hafa tæplega 3.000 þeirra sent inn beiðni um endurútreikning í gegnum heimasíðu bankans eða með því að hafa beint samband við starfsmenn.

Um 60% þeirra sem hafa ofgreitt hafa ákveðið að láta endurgreiðsluna ganga inn á höfuðstól lánsins, en 40% hafa kosið að fá hana greidda inná reikning. Ný lánsskjöl verða send til þeirra viðskiptavina sem hafa sent beiðni um endurútreikning og munu þau berast á næstu dögum.

„Við erum afar ánægð með það hversu vel gengur að taka við beiðnum um endurútreikninga. Meirihluti þeirra sem eiga inni hjá okkur hafa ákveðið að láta endurgreiðsluna ganga inná höfuðstól lánsins og lækka þannig skuldsetninguna, sem er að mínu mati skynsamleg leið," segir Ingvar Stefánsson, yfirmaður Íslandsbanka Fjármögnunar.

„Nú er næsta skref að endurútreikna lán sem hafa verið uppgreidd hjá okkur og varðandi yfirteknu lánin þá er meðhöndlun þeirra vonandi að skýrast með nýju lagafrumvarpi viðskiptaráðherra."