Ólíklegt að samþjöppun á matvörumarkaði verði aftur eins

Samkeppniseftirlitið hefur ríkari heimildir í dag en áður til að koma í veg fyrir samþjöppun á markaði sem skaðar samkeppni ef hún á sér í stað í gegnum kaup á fyrirtækjum, segir Páll Gunnar Pálsson, forstjóri Samkeppniseftirlitsins, aðspurður hvort samþjöppun á matvörumarkaði geti aftur orðið með svipuð hætti og hún hefur verið undanfarin ár.

Stærstur hluti matvöruverslana hefur verið í eigu Haga, sem var í eigu Baugs. Stór hluti verslana hefur einnig verið í eigu Kaupáss, sem er aftur í eigu Jóns Helga Guðmundssonar. Hagar eru núna í eigu Arion banka og í gær tilkynnti bankinn að 10-11 verslanirnar yrðu seldar út úr fyrirtækinu.

Páll Gunnar segir að samkvæmt samkeppnislögum beri að tilkynna samruna sem sé yfir tilteknum veltumörkum til Samkeppniseftirlitsins. Samkeppniseftirlitið taki það til athugunar og geti beitt íhlutun á markaði, ógilt samruna eða sett honum skilyrði. Páll Gunnar segir að þessar reglur hafi verið að styrkjast með árunum og hafi til dæmis ekki verið fyrir hendi með sama hætti þegar að þeir aðilar sem ráku Hagkaup og Bónus keyptu 10-11.