Greining býst við verulegum frekari gjaldskrárhækkunum OR

Greining Arion banka segir að endurskipulagning Orkuveitu Reykjavíkur (OR) muni meðal annars krefjast þess að verulegar frekari gjaldskrárhækkanir komi til, Reykjavíkurborg leggi til aukið eigiðfé og lán verði endurfjármögnuð.

Greiningin fjallar um málið í Markaðspunktum sínum. Þar segist hún reikna með að líklegasta niðurstaðan sé blanda af þessu þrennu.

Greining bendir á að jafnvel þótt það takist að endurfjármagna lán Orkuveitunnar muni það kosta mun lakari lánakjör en nú eru í boði sem aftur kalli á frekari gjaldskrárhækkanir.

Skuldir Orkuveitunnar nema nú 228 milljörðum króna. Af þeim eru 88% með breytilegum vöxtum og þar sem lánshæfi Orkuveitunnar er í ruslflokki hjá Moody´s muni það kosta töluverðar vaxtahækkanir að endurfjármagna lánin.