Vettel: Erum dálítið brjálaðir

Sebastian Vettel náði besta tíma í tímatökum á Silverstone brautinni í dag, en einhver áhöld er um að hann hafi fengið betri framvæng á bíl sinn en Mark Webber af því liðið tekur hann framyfir Webber. Vettel er ofar í stigamótinu og Christian Horner tók ákvörðun um að hann fengi væng undan bíl Webbers eftir að hans brotnaði á lokaæfingunni. Webber var sýnilega stúrinn á fréttamannfundi eftir keppnina samkvæmt frétt á autosport.com. En Vettel var ánægður með árangur dagsins, en hann vann mótið í fyrra á Red Bull. "Bíllinn virkar vel á brautinni, í þessum beygjum og hraðinn mikill. Ég held við séum allir dálítið brjálaðir, en þetta er svo gaman", sagði Vettel. "Nýi hluti brautarinnar, beygjur ellefu og tólf eru frábærar og ég kann vel við mig á brautinni og bíllinn virkar vel. Að ná fremsta stað á ráslínu er lykill að árangri í kappakstrinum." Vettel var spurður hvort hann væri í uppáhaldi hjá Red Bull og hefði því fengið betri framvæng en Webber. "Það er erfitt að dæma hlutina utan frá séð, en við vitum hvað við erum að gera, að ég held", svaraði Vettel. Bein útsending er frá mótinu á Silverstone á sunnudag í opinni dagskrá á Stöð 2 Sport kl. 11.30.