Hafnar því að sjóðurinn hafi brotið lög

Framkvæmdastjóri Almenna lífeyrissjóðsins hafnar því alfarið að sjóðurinn hafi gerst brotlegur við lög með fjárfestingum sínum fyrir hrun. Hann segir mistök að keypt var skuldabréf í þeim tilgangi að Kaupþing og Glitnir héldu velli.

Eins og fréttastofa greindi frá í vikunni tóku Almenni lífeyrissjóðurinn og Lífeyrissjóður verkfræðinga þátt í viðskiptum með skuldatryggingar á Kaupþing og Glitni með milligöngu Landsbankans við svissneska bankann UBS fyrir bankahrunið. Þessu var þannig stillt upp að ef bankarnir tveir féllu, græddi svissneski bankinn, en ef íslensku bankarnir héldu velli til ársins 2013 þá fengju fengju lífeyrissjóðirnir vexti á fjárfestinguna. Einn félagi í Lífeyrissjóði verkfræðinga kallaði þetta glórulaust fjárhættuspil.

Gunnar Baldvinsson, framkvæmdastjóri Almenna lífeyrissjóðsins, segir að lífeyrissjóðurinn hafi ekki keypt afleiður með skuldatryggingar á bankana, um skuldabréf hafi verið að ræða og viðskiptin fullkomlega lögleg.

Grunnforsendan var að Kaupþing og Glitnir héldu velli til ársins 2013, en í mars 2008 hafi lánshæfi þessara banka verið metið hátt.

Gunnar Baldvinsson, framkvæmdastjóri Almenna lífeyrissjóðsins. Mynd/GVA