HSÍ tapaði rúmum 23 milljónum á síðasta rekstrarári

Ársþing HSÍ var haldið í dag en á því var Knútur G. Hauksson endurkjörinn formaður sambandsins. Þá var einnig gert upp síðasta rekstrarár í tölum.

Fram kom að HSÍ hafi tapað rúmum 23 milljónum króna á síðasta ári og segir í tilkynningu frá sambandinu að það megi helst rekja til efnahagshrunsins. Framlög og styrkir drógust saman á meðan að útgjöld hækkuðu vegna slæmrar stöðu íslensku krónunnar.

Eigið fé sambandsins er jákvætt eða tæpar 20 milljónir króna. Í fyrra nam hagnaður sambandsins 43 milljónum króna.

Annars voru litlar breytingar gerðar á lögum sambandsins. Tilkynninguna frá HSÍ má lesa í heild sinni hér fyrir neðan:

"53. Ársþing HSÍ var haldið í dag 21. Apríl 2010. Þingstörf gengu mjög vel fyrir sig.

Litlar breytingar voru gerðar á lögum sambandsins á ársþingi þar sem miklar breytingar voru gerðar fyrir tveim árum síðan sem gerði það að verkum að ársþing HSÍ fjallar eingöngu um lög sambandsins en ekki reglugerðir.

Velta sambandsins á árinu var 152.888.010.- Tap var á rekstrarárinu 2009 23.497.992.-. Þess má geta að eigið fé sambandsins er jákvætt um 19.826.842.- Tap ársins má rekja að stærstum hluta til efnahagshrunsins sem varð á Íslandi en framlög

og styrkir drógust saman á meðan að útgjöld hækkuðu töluvert vegna stöðu íslensku krónunnar og hækkunar á ferðakostnaði.

Kosið var um formann HSÍ og var Knútur G Hauksson endurkjörinn formaður.

Kosið var um 4 stjórnarmenn til tveggja ára en það eru: Árni Þór Árnason, Guðjón L. Sigurðsson, Gunnar Erlingsson og Kristján Arason. Gunnar kemur í stjórn í stað Harðar Davíðs Harðarsonar sem gaf ekki kost á sér áfram.

Kosið var um 3 varamenn til eins árs en það voru þau Hannes Karlsson, Þorbjörg Gunnarsdóttir og Þorgeir Haraldsson."