Kristinn: Misstum liðsheildina

Kristinn Guðmundsson, aðstoðarþjálfari HK, sagði að liðsheildin hjá sínum mönnum hafi ekki verið upp á marga fiska gegn Fram í kvöld.

HK-ingar töpuðu stórt í Safamýrinni, alls með tíu marka mun en þó eftir að hafa náð að minnka muninn í eitt mark þegar rúmar þrettán mínútur voru til leiksloka.

Þá kom algjört hrun hjá HK sem tapaði sínum öðrum leik í röð í kvöld.

„Við gerðum okkur grein fyrir því að við vorum að mæta sterku liði Fram hér í kvöld," sagði Kristinn. „Þeir voru með svörin við því sem við vorum að gera og við vorum ekki nógu klókir til að bregðast við þeirra aðgerðum."

„Varnarleikinn stóðum við mjög illa og við vorum skrefinu á eftir öllum þeirra aðgerðum. Við náðum aðeins að koma þeim úr jafnvægi með því að taka Halldór Jóhann úr umferð og hleypa spennu í leikinn."

„En um leið og þeir skriðu frá okkur aftur þá komu veikleikar okkar í ljós. Við vorum bara ekki með góða liðsheild inn á vellinum í kvöld og það er ekki það sem við höfum verið þekktir fyrir í vetur."

„Við verðum að skoða ástæður þess mjög vel og bæta okkur. Það er engin krísa í gangi. Við höfum nú spilað við tvö mjög sterk lið og við teljum okkur fyllilega samkeppnishæfa við þessi lið. En þegar við erum ekki upp á okkar besta þá endar þetta svona."

Margir af lykilmönnum HK fundu sig illa í kvöld og munar um minna.

„Við höfum í þessum leikjum sem við höfum verið að vinna átt minnst þrjá útileikmenn sem hafa verið að spila upp á sitt besta. Í kvöld vantaði töluvert upp á það og er það eitthvað sem við þurfum að skoða - hvað það var sem klikkaði í sóknarleiknum hjá okkur."

„Flotið var ekki nógu gott á boltanum og menn ætluðu bara að gera hlutina sjálfir. Þannig erum við ekki nógu góðir. Hins vegar eru allir þessar strákir mjög góðir þegar við spilum okkar bolta. Við erum bestir þegar við spilum saman sem eitt lið og við misstum þann takt í dag."