Umfjöllun: Valskonur í lykilstöðu eftir öruggan sigur á Þór/KA

Valur er með sex stiga forystu í Pepsi-deild kvenna eftir leiki kvöldsins. Valskonur unnu öruggan sigur á Þór/KA 3-0 á Vodafone-vellinum og þurfa að misstíga sig hressilega í þeim umferðum sem eftir eru til að missa af Íslandsmeistaratitlinum.

Það var þungt yfir að líta á Hlíðarenda í kvöld, rigning og rökkur. Akureyrarliðið byrjaði leikinn ágætlega en svo tók heimaliðið völdin og vann á endanum verulega verðskuldaðan sigur.

Vesna Smiljkovic átti fyrsta skot leiksins fyrir Þór/KA en yfir fór boltinn. Hinumegin átti Rakel Logadóttir svipaða marktilraun sem einnig endaði yfir.

Valskonur voru mun betri og Björg Gunnarsdóttir fékk flott færi eftir góðan undirbúning Kristínar Ýr Bjarnadóttur en Berglind Magnúsdóttir í marki Þórs/KA varði vel. Kristín fékk síðan dauðafæri skömmu síðar eftir Berglind fékk sendingu til baka og vissi ekki hvað hún átti að gera. Berglind var stálheppin að boltinn endaði yfir markinu.

Það var svo eftir hálftíma leik sem Valur náði forystunni verðskuldað. Rakel Logadóttir skoraði þá með skoti rétt fyrir utan markteiginn eftir mistök í vörn Þórs/KA. Rétt fyrir hálfleik bætti Helga Sjöfn Jóhannesdóttir svo við öðru marki í kjölfarið á fyrirgjöf Thelmu Einarsdóttur.

Staðan 2-0 fyrir Val í hálfleik og liðið var aldrei líklegt til að tapa niður þeirri forystu í seinni hálfleiknum. Mateja Zver fékk reyndar tvö dauðafæri til að minnka muninn, var ein gegn Maríu Björg Ágústsdóttur en í bæði skiptin varði María meistaralega. Zver var verulega ósátt við sig í bæði skiptin og lá svekkt í grasinu.

Björk Gunnarsdóttir átti stangarskot fyrir Val áður en liðið bætti við þriðja markinu. Þar var að verki Hallbera Guðný Gísladóttir með marki beint úr aukaspyrnu. Þetta reyndist síðasta mark leiksins en Valsliðið var líklegra til að bæta við í lokin en gestirnir að jafna.

Valur - Þór/KA 3-0

1-0 Rakel Logadóttir (30.)

2-0 Helga Sjöfn Jóhannesdóttir (45.)

3-0 Hallbera Guðný Gísladóttir (72.)

Lið Vals:

María Björg Ágústsdóttir (m)

Pála Marie Einarsdóttir

(84. Heiða Dröfn Antonsdóttir)

Rakel Logadóttir

(78. Katrín Gylfadóttir)

Katrín Jónsdóttir (f)

Kristín Ýr Bjarnadóttir

(68. Dagný Brynjarsdóttir)

Dóra María Lárusdóttir

Hallbera Guðný Gísladóttir

Thelma Björk Einarsdóttir

Helga Sjöfn Jóhannesdóttir

Embla Sigríður Grétarsdóttir

Björk Gunnarsdóttir

Lið Þórs/KA:

Berglind Magnúsdóttir (m)

Gígja Valgerður Harðardóttir

Silvía Rán Sigurðardóttir

Rakel Hinriksdóttir

Vesna Smiljkovic

Rakel Hönnudóttir (f)

Mateja Zver

(88. Arna Harðardóttir)

Bojana Besic

Brynja Dögg Sigurpálsdóttir

(46. Karen Nóadóttir)

Eva Hafdís Ásgrímsdóttir

Danka Podovac

(78. Lára Einarsdóttir)