Búið að afskrifa 272 milljarða af skuldum fyrirtækja

Stóru bankarnir og sparisjóðir hafa afskrifað 272 milljarða króna af skuldum fyrirtækja í landinu á tveimur árum. Enn eru þó þúsundir skuldamála fyrirtækja óleyst. Þetta er einn tólfti af því sem bankakerfið hefur afskrifað af skuldum heimilanna.

Fréttastofa óskaði eftir því fyrir nokkrum vikum að fá upplýsingar hjá bönkunum, hversu mikið þeir hefðu afskrifað af skuldum fyrirtækja í landinu eftir hrun. Tölurnar bárust í dag - og eru fyrstu heildartölur sem birtast um hvað raunverulega er búið að afskrifa af skuldum fyrirtækja.

Og tölurnar sýna að 272 milljarðar króna hafa verið afskrifaðir af skuldum fyrirtækja og eignarhaldsfélaga frá ársbyrjun 2009. Þar af hefur 71 milljarður tapast vegna fyrirtækja sem bankar hafa neyðst til að taka yfir.

Fyrirtæki sem enn eru undir stjórn sömu eigenda hafa hins vegar fengið 41 milljarð króna afskrifaðan. Langmest hefur þó verið afskrifað af skuldum fyrirtækja sem nú eru gjaldþrota eða 160 milljarða króna.

Til að setja þessar tölur í samhengi má benda á að í ársbyrjun 2009 skulduðu fyrirtæki og eignarhaldsfélög 1344 milljarða króna. Á sama tíma skulduðu heimilin bönkunum 512 milljarða.

Nú er þá búið að afskrifa um 20% af skuldum fyrirtækja og félaga - en um 4% af skuldum heimilanna. Auk þeirra afskrifta sem búast má við hjá heimilum og fyrirtækjum samkvæmt samkomulagi milli stjórnvalda og banka - herma heimildir fréttastofu að í pípunum séu jafnvel hundruð milljarða afskriftir hjá ónýtum eignarhaldsfélögum sem bankarnir hafi enn ekki gengið frá.

Ríkið þarf á næsta ári að skera niður um 30 milljarða króna - við lítinn fögnuð - sú tala virkar þó harla lítil í samanburðinum - enda er búið að afskrifa níu sinnum þá tölu í bankakerfinu af skuldum fyrirtækja.