Róltól til sýnis í Kringlunni

Fyrstu GSM farsímarnir sem seldir voru hér á landi árið 1994 eru til sýnis í verslun Símans í Kringlunni. Þróun símkerfisins allt til dagsins í dag er sýnd. Það er Síminn og Græn framtíð sem stendur að baki sýningunni.

GSM kerfið var tekið í notkun í ágúst árið 1994 og í lok þess árs voru notendur í kringum 10 þúsund. Þremur árum síðar var SMS þjónusta kynnt til sögunnar á Íslandi. Orðið Gemsi er oftast notað yfir farsíma en á upphafsárum farsímavæðingar á Íslandi komu ýmis nöfn til álita. Þegar dagblaðið Dagur efndi árið 1996 til samkeppni meðal lesanda um heiti á GSM birtust nöfn eins og róltól, Lon og don, gutti, gosi, tummi, tífa og þrasi en að lokum var orðið Gemsi valið, segir í tilkynningu til fjölmiðla vegna sýningarinnar.

Á sýningunni í Kringlunni er hægt að sjá farsímaþróunina; frá upphafsárum farsímavæðingar fram til dagsins í dag, farsímasöguna og skemmtilegar GSM auglýsingar í gegnum tíðina. Farsímasýningin stendur til 11. nóvember.