Sölutregða á íslenskum fiski í Evrópu

Nokkuð hefur dregið úr sölu á íslenskum fiskafurðum á Evrópumarkaði að undanförnu. Þetta er öfugt við þróunina á undanförnum árum því fisksalan hefur yfirleitt glæðst á þessum mörkuðum í aðdraganda jólanna.

Indriði Ívarsson sölustjóri hjá Ögurvík segir að hann telji tvær meginástæður fyrir þessu. Sú helsta er að almenningur í flestum Evrópulöndum hefur nú minna milli handanna en áður vegna kreppunnar. „Neytendur sækja því í ódýrari vörur en íslenskan fisk," segir Indriði.

Hin ástæðan að mati Indriða er að markaðsaðilar í Evrópu eiga von á holskeflu af fiski frá Barentshafi seinna í vetur en yfir 700.000 tonna þorskkvóti hefur verið gefinn út þar. „Við merkjum þetta þannig að kaupendur eru að kaupa minna í hvert skipti en áður," segir Indriði. „Þeir búast við hagstæðari verðum þegar Barentshafsfiskurinn skellur á markaðinn."

Aðspurður hvort vetrarhörkurnar í Evrópu spili inn í þróunina telur Indriði svo ekki vera. „Allavegna hafa viðskiptavinir okkar ekki haft orð á slíku," segir Indriði. „Sjálfir höfum við verið að senda fisk um Bretland, Þýskaland og allt niður í Króatíu án teljandi vandræða þrátt fyir þunga færð í þessum löndum."