„Fjárhættuspil“ lífeyrissjóða til rannsóknar hjá FME

Grunur leikur á að tveir lífeyrissjóðir hafi brotið lög með viðskiptum með skuldatryggingar á Glitni og Kaupþing og er málið til rannsóknar hjá Fjármálaeftirlitinu. Viðskiptin hafa verið kölluð „glórulaust fjárhættuspil."

Eins og fréttastofa greindi frá í gærkvöldi tóku Almenni lífeyrissjóðurinn og Lífeyrissjóður verkfræðinga þátt í viðskiptum með skuldatryggingar á Kaupþing og Glitni með milligöngu Landsbankans við svissneska bankann UBS fyrir bankahrunið. Þessu var þannig stillt upp að ef bankarnir tveir féllu, græddi svissneski bankinn, en ef íslensku bankarnir héldu velli til ársins 2013 þá fengju fengju lífeyrissjóðirnir vexti á fjárfestinguna. Lífeyrisjóðirnir töpuðu milljörðum króna á þessu ævintýri, en svissneski bankinn græddi, þegar íslensku bankarnir fóru á hliðina. Þorbergur Steinn Leifsson, sem er í lífeyrissjóði verkfræðinga, hefur kallað viðskipti með þessar skuldatryggingar „glórulaust fjárhættuspil."

Nú eru vísbendingar um að þessi viðskipti hafi hreinlega verið ólögleg. Því í lögum um skyldutryggingu lífeyrisréttinda og starfsemi lífeyrissjóða er tæmandi talning á því í hverju lífeyrissjóðir mega fjárfesta og þar segir að lífeyrissjóðum sé aðeins heimilt að fjárfesta í afleiðum sem dragi úr áhættu viðkomandi lífeyrissjóðs. Fram kemur í skriflegu svari Fjármálaeftirlitsins við fyrirspurn fréttastofu að skuldatrygging ein og sér verði vart flokkað annað en sem afleiða. Og að ef lífeyrissjóðir fjárfesti í skuldatryggingum verði þeir að geta sýnt fram á að það sé til þess að draga úr áhættu viðkomandi lífeyrissjóðs.

Samkvæmt heimildum fréttastofu er mál Almenna lífeyrissjóðsins og Lífeyrissjóðs verkfræðinga nú til rannsóknar hjá Fjármálaeftirlitinu vegna gruns um brots á lögunum, en þau varða samkvæmt lögunum sektum eða fangelsi í allt að einu ári. Ef það verður niðurstaða FME að lífeyrissjóðirnir sem eigi í hlut hafi gerst brotlegir við lögin verður málinu vísað til sérstaks saksóknara.