Óeðlilegt að ríkið ásælist tekjustofna sveitarfélaga

Þetta kom fram í máli Halldórs í morgun þegar hann setti fjármálaráðstefnu sveitarfélaga sem haldin er á Hilton Nordica Hótel.

Í ræðu sinni fjallaði hann m.a. um frumvarp til fjárlaga sem nú liggur fyrir Alþingi og gerði þá kröfu að brugðist verði við endurteknum beiðnum sambandsins um að taka upp alvöru samstarf um laga- og reglugerðabreytingar sem hafa í för með sér aukinn kostnað fyrir sveitarfélögin.

"Mig langar til að taka það skýrt fram hér að sveitarfélögin hófu strax sínar hagræðingaraðgerðir, ríkið byrjaði miklu seinna með sínar aðgerðir eða allt að ári síðar. Það er einfaldlega svifaseinna og ekkert óeðlilegt við það," segir Halldór.

„Hins vegar er óeðlilegt að ríkið nýti sér yfirburði framkvæmda- og lagasetningarvalds síns til að ásælast tekjustofna sveitarfélaga. Ég mun koma betur að því á eftir og ræða um leið þá staðreynd að ríkið hefur jafnframt dekkað alla mögulega tekjustofna og hefur ekki brugðist við þráfaldlega endurtekinni beiðni sambandsins um að gera sveitarfélögum kleift að hagræða í rekstri sínum í málefnum grunnskólans og fleiri rekstrarliðum þar sem lög og reglugerðir binda hendur stjórnenda sveitarfélaga."