Fasteignakaupsamningum fækkar á ný

Enn dregur úr fasteignakaupum á höfuðborgarsvæðinu. Eftir að fasteignamarkaðurinn virtist vera að taka eilítið við sér í haust, fækkar kaupsamningum aðra vikuna í röð.

49 samningum vegna fasteignakaupa á höfuðborgarsvæðinu var þinglýst í vikunni - og hafa ekki verið færri í 3 mánuði. Markaðurinn lifnaði aðeins við í haust og náði hámarki fyrstu vikuna í september þegar 90 eignir seldust á höfuðborgarsvæðinu. Síðustu tvær vikur hefur salan hins vegar farið að dala á ný. Nokkuð ólík skilaboð hafa verið að berast til almennings um fasteignamarkaðinn, þannig segir nýjasta þjóðhagsspá Seðlabankans að fasteignaverð eigi enn eftir að fara lækkandi. Íslandsbanki velti hins vegar fyrir sér í morgunkorni fyrr í mánuðinum hvort framhald verði á verðhækkunum á íbúðamarkaði, en samkvæmt fasteignamati ríkisins hefur íbúðaverð heldur hækkað á höfuðborgarsvæðinu síðan í júlí - og er nú á svipuðum slóðum og það var í upphafi sumars.

Fyrir tæpum mánuði hvatti formaður Félags fasteignasala stjórnvöld til að komast að niðurstöðu í skuldamálum heimilanna því fólk haldi að sér höndum á meðan það bíði eftir endanlegum úrræðum. Síðan þá hefur reiknimeistarahópur stjórnvalda skilað af sér skýrslu með útreikningum á kostnaði við flestar þær leiðir sem ræddar hafa verið opinberlega til að takast á við bólgnar skuldir heimilanna. Tíu dagar eru síðan hópurinn skilaði af sér, stjórnvöld hafa þó enn ekki gefið út hvað þau hyggist gera við niðurstöður hópsins.