Schumacher segir gagnrýni á sig hluta af skemmtanabransanum

Michael Schumacher kveðst ekki taka mikið mark á gagnrýni á getu hans, sem fram hefur komið og í frétt á autosport.com ert tiltekið sérstaklega umræða sem Martin Brundle og Eddie Jordan komu af stað með umælum í sjónvarpsútsendingum á BBC sem þeir starfa við. Þeir gagnrýndu frammistöðu hans í síðasta móti í Kanada. "Ég tek þá ekki alvarlega, Formúla 1 er margþætt og eitt af því er að þetta er skemmtanabransi líka. Ég tek því gagnrýninni ekki alvarlega, þetta er hluti af leiknum og að væla yfir mér vekur athygli, sem er kannski gert vitandi vits. Það væri betra að vera laus við það, eða að heyra á því og þurfa að svara spurningu um það. En svona lítur þetta út í mínum huga", sagði Schumacher í fréttinni. Schumacher segir þó að hann hefði mögulega geta staðið sig betur það sem af er. "Já. Ég hefði gert mistök og hefði getað gert betur á sumum sviðum, en á heildina litið þá er ég ekki viss um að það séu margir 41 árs menn sem hefðu getað mætt í slaginn eftir þriggja ára hlé og keppt. Ég hef ekki tapað þekkingu minni. Ég veit hvað ég er að gera og geri mitt besta. Þegar ég vann 91 mót, þá var ég alltaf að hugsa um að bæta mig og geri það enn." Schumacher segir að helsta vandamál sitt sé að skilja dekkin, sem eru annarskonar en þegar hann keppti á sínum tíma. "Stærsta málið er að ná tökum á dekkjunum og skilja virkni þeirra. Það hefur ekki tekist sem skyldi í tímatökum. Dekkin er ólík því sem ég var að fást við, en það eru allir í vandræðum. Þetta hefur komið okkur á óvart og við lentum sérstaklega í þessu í Kanada, en þetta hefur verið helsta vandmál Mercedes liðsins á árinu", sagði Schumacher. Schumacher náði áttunda besta tíma á æfingum í Valencia í morgun, en félagi hans Nico Rosberg á Mercedes reyndist fljótastur. Schumacher var 1.1 sekúndu á eftir honum. en Rosberg náði besta tíma eftir að hafa prófað búnað sem bætir loftflæði á afturvæng bílsins.