Kjötvinnslufyrirtæki ná sátt við Samkeppniseftirlitið

Sláturfélag Suðurlands, Reykjagarður og Kaupfélag Skagfirðinga hafa gert sátt við Samkeppniseftirlitið og ætla að aðstoða við rannsókn á samkeppnishömlum á kjötmarkaði. Fyrirtækin greiða samtals 85 milljónir króna í sekt og grípa til ráðstafana sem ætlað er að efla samkeppni.

Samkeppniseftirlitið hefur haft til rannsóknar hvort annars vegar verslanir Bónuss í eigu Haga og hins vegar átta kjötvinnslufyrirtæki hafi brotið gegn 10. grein samkeppnislaga. Samkeppniseftirlitið segir að fyrirtækin hafi gert þetta með tvíhliða samningum eða samstilltum aðgerðum í tengslum við smásöluverðlagningu á kjöti og unnum kjötvörum sem kjötvinnslurnar hafa sérmerkt fyrir Haga.

Samkvæmt samkomulaginu viðurkenna fyrirtækin að hafa brotið umrædda lagagrein.