Umfjöllun: Dramatískur sigur Hauka á Aftureldingu

Íslandsmeistararnir í Haukum unnu góðan sigur á nýliðum Aftureldingar 22-23 í miklum háspennu leik  í kvöld. Björgvin Hólmgeirsson skoraði sigurmarkið þegar sjö sekúndur voru eftir af leiknum. Stemmningin í Mosfellsbæ var með hreinum ólíkindum  en það dugði ekki til fyrir heimamenn.

Leikurinn byrjaði heldur rólega og liðin virtust frekar ryðguð. Stuðningsmenn Aftureldingar voru aftur á móti allt annað en rólegir. Stemmningin í húsinu var gjörsamlega frábær og fólk að skemmta sér vel.

Heimamenn voru með yfirhöndina fyrstu mínútur leiksins og komust í 3-1.  Haukar áttu erfitt með að koma boltanum í netið  fyrstu tíu mínúturnar og leikmenn liðsins voru langt frá sínu besta.

Þegar um tíu mínútur voru eftir af fyrri hálfleik náðu Haukar að komast yfir 7-6 í fyrsta skiptið í leiknum. Björgvin Hólmgeirsson var komin í gang og bar uppi sóknarleik gestanna. Jafnt var á öllum tölum út hálfleikinn og staðan 12-12 þegar leikmenn gengu til búningsherbergja. Bæði lið spiluðu hörku varnarleik og lítið um markaskor í fyrri hálfleiknum. 

Heimamenn byrjuðu mun betur í seinni hálfleik og komust í 15-12 en Haukar skoruðu sitt fyrsta mark í síðari hálfleiknum eftir átta mínútur. Eftir slæma byrjun fór Haukavélin að fara í gang en þeir náðu að komast yfir um miðjan seinni hálfleik, 17-18.

Jafnt var á öllum tölum það sem eftir lifði leiks og mikil spenna. Þegar tuttugu sekúndur voru eftir var  staðan 22-22 og Haukar taka leikhlé. Eftir leikhléið var greinilega stillt upp í kerfi sem átti að enda með skoti í blálokin. Björgvin Hólmgeirsson fékk boltann fyrir utan, lyfti sér upp og þrumaði boltanum í netið þegar sjö sekúndur voru eftir af leiknum.

Afturelding fékk tækifæri í restina til að jafna leikinn en skot Jóhanns Jóhannssonar fór forgörðum.

Niðurstaðan því virkilega mikilvægur sigur fyrir Hauka,  en það er nokkuð ljóst að lið Aftureldingar verður virkilega erfitt heim að sækja í vetur.

Afturelding - Haukar 22-23 (12-12)

Mörk Aftureldingar (skot): Bjarni Aron Þórðason 8(15) , Þorkell Guðbrandsson 5(5), Jón Andri Helgason 2(3), Arnar Theodórsson 2(3), Ásgeir Jónsson 2(2), Reynir Ingi Árnason 1(1), Hrafn Ingvarsson 1(3), Jóhann Jóhannsson 1(4)

Varin skot: Hafþór Einarsson 15 

Hraðaupphlaupsmörk: 1 (Hrafn Ingvarsson)

Fiskuð víti: 4 (Ásgeir Jónsson 2,Þorkell Guðbrandsson, Jón Andri Helgason)

Brottvísanir:  8 mínútur

Mörk Hauka (skot): Björgvin Þór Hólmgeirsson 10 (18), Guðmundur Árni Ólafsson 4 (9), Þórður Rafn Guðmundsson 4 (7), Freyr Brynjarsson 2 (2), Heimir Óli Heimisson 1 (3) Stefán Rafn Sigurmannsson  1 (5), Einar Örn Jónsson 1(1).

Varin skot: Birkir Ívar Guðmundsson 5, Aron Rafn Eðvarðsson 4.

Hraðaupphlaupsmörk: 2 (Heimir Óli, Guðmundur Árni)

Fiskuð víti: 4 (Heimir Óli 3, Freyr Brynjarsson 1)

Brottvísanir: 16 mínútur