Hagnaður Eimskips umfram væntingar

Hagnaður Eimskips fyrstu sex mánuði árins 2010 er umfram væntingar að því er fram kemur í tilkynningu frá félaginu en rekstrarhagnaður var jákvæður um 3,4 milljarða íslenskra króna. Hagnaður eftir skatta var 1,3 milljarðar og heildareignir félagsins í lok júní voru 46 milljarðar. Eiginfjárhlutfall Eimskips er nú 54 prósent og vaxtaberandi skuldir eru 12 milljarðar.

Ef litið er til annars ársfjórðungs er rekstrarhagnaður jákvæður um 2,1 milljarða og hagnaður eftir skatta 1,1 milljarður. Í tilkynningunni segir að allar rekstrareiningar skili afkomu umfram væntingar. „Flutningamagn á öðrum ársfjórðungi til og frá Íslandi jókst um 11% á milli ára og er það í fyrsta sinn síðan á fyrri helmingi ársins 2008 sem aukning er í flutningum. Flutningar hafa þó dregist verulega saman og er magnið nú svipað og það var árið 2000."

Gylfi Sigfússon forstjóri Eimskips segir að þrátt fyrir mjög erfið rekstrarskilyrði hafi tekist að snúa afkomu félagsins við. „Reksturinn hefur verið sniðinn að breyttum markaðsaðstæðum og er árangur þeirrar vinnu að líta dagsins ljós. Starfsemi Eimskips krefst mikilla fastafjármuna og er mikilvægt að afkoman geti staðið undir endurnýjun þeirra," segir Gylfi.

„Á síðustu árum hefur félagið ekki varið miklum fjármunum í fjárfestingar tengdum flutningastarfsemi. Sjóðsstaðan er góð og er félagið nú í stakk búið að endurnýja eignir." Gylfi segir það mjög mikilvægt fyrir Eimskip að viðhalda grunnstoð félagsins sem er, flutningakerfið á Norður Atlantshafi, til að tryggja viðskiptavinum áreiðanlega og góða þjónustu.