Mark Webber: Mæti til að sigra

Forystumaður stigamótsins, Ástralinn Mark Webber er með markmið sitt á hreinu fyrir Formúlu 1 mótið í Singapúr um helgina. Hann er með fimm stiga forskot á Lewis Hamilton í stigakeppni ökumanna.

Webber hefur ekki lokið keppni í Singapúr til þessa, en tvö mót hafa farið fram og Hamilton vann í fyrra, en Fernando Alonso árið á undan. Báðir eru í titilslagnum, auk Sebastian Vettel og Jenson Button. Þeir geta allir orðið meistarar þegar fimm mótum er ólokið.

"Ég er í forystu og það eru nokkrir gæjar,sem hafa færri stig og þetta verður áhugavert. Þetta getur breyst hratt á jákvæðan eða neikvæðan hátt á skömmum tíma. Ég er í þægilegri stöðu með flest stigin", sagði Webber á fundi með fréttamönnum í Singapúr í dag.

"Það skiptir ekki máli hvort það eru tveir, fimm eða átta gæjar að keppa um það sama. Ég vinn mitt verk á sama hátt. Ég mæti til að sigra og það er markmið okkar."

Samkeppnin verður hörð í næstu mótum milli fimmenninganna, en telur Webber að einhver missi af lestinni á næstunni?

"Það mun gerast. Munum allir fimm verða í slagnum til loka í Abu Dhabi? Það gæti gerst, en það er ólíklegt. Það gæti orðið fjórir, eða þrír, eða einn. Hver veit. Ekki við. Það eina sem ég veit er að við verðum að ljúka mótunum. Við verðum að vera í slagnum í Abu Dhabi. Það er mikilvægast. Ekki hver er í forystu í stigamótinu í Singapúr, heldur þegar öllum mótum er lokið", sagði Webber.