Aldrei reiknað með að 200 milljarðar fengjust

Breytir synjun slitastjórnar Sparisjóðabankans á kröfu Seðlabankans einhverju um endanlegt tap Seðlabankans?

Þó að ríkissjóður og Seðlabankinn hafi gert yfir 200 milljarða kröfu í bú Sparisjóðabankans (áður Icebank) var aldrei reiknað með að sú fjárhæð fengist greidd. Ástæðan er einföld; eignir búsins eru aðeins nokkrir tugir milljarða. Það er hins vegar venja í málum sem þessu að menn krefjist þess sem þeir telja sig eiga.

Slitastjórn Sparisjóðabankans hafnaði kröfunum. Ekki er þó þar með sagt að niðurstaðan verði sú að Seðlabankinn fái ekki neitt. „Það kemur til álita að hann [Seðlabankinn] yfirtaki kröfu okkar á þá [gömlu viðskiptabankana],“ sagði Andri Árnason, formaður slitastjórnarinnar, í samtali við Fréttablaðið í september. Sigli samningaviðræður þar um í strand verður það dómstóla að skera úr um.

Krafa Seðlabankans á Sparisjóðabankann er vegna lána sem Sparisjóðabankinn fékk hjá Seðlabankanum og lánaði áfram til viðskiptabankanna þriggja. Að veði voru skuldabréf, gefin út af bönkunum. Við fall þeirra hrundi verðmæti bréfanna.

Ósennilegt er að hver einasta króna sem Seðlabankinn lánaði með þessum hætti sé honum eða ríkissjóði endanlega glötuð. Þó að ekki takist samningar við slitastjórnina um yfirtöku krafna í bú viðskiptabankanna og þó að dómstólar dæmi slitastjórninni í vil á Seðlabankinn enn veðin. Þó að virði þeirra hafi hrunið eru þau ekki með öllu verðlaus.

Endanlegt tap Seðlabankans af lánveitingum til viðskiptabankanna í gegnum smærri banka er enn óljóst. Talið er að það muni liggja á bilinu tvö til þrjú hundruð milljarðar. Heimtur úr búum bankanna ráða mestu um hver niðurstaðan verður en ár og dagar eru í að það liggi fyrir.

bjorn@frettabladid.is