Spákaupmenn vaknaðir til lífsins á skuldabréfamarkaði

Spákaupmenn eru vaknaðir til lífsins á skuldabréfamarkaðinum hér á landi eftir harða útreið í september. Þetta kemur fram í markaðsfréttum Íslenskra verðbréfa þar sem fjallað er um stöðuna á skuldabréfamarkaðinum.

Í markaðsfréttum segir að það sé ákveðin óvissa með framhaldið, þ.e. hverning þróun markaðarins verður. Krafa ríkistryggðra bréfa er komin niður fyrir þau mörk sem lífeyrissjóðirnir telja sér fært að fara niður í vegna neikvæðra áhrifa á útreikning framtíðarstöðu þeirra. Þeir eru líka nokkuð vel settir eftir kaupin á „Avensbréfunum".

„Helstu kaupendur í dag eru því aðrir fagfjárfestar en lífeyrissjóðir s.s. tryggingafélög, sveitarfélög o.fl. Verðbréfasjóðir hafa einnig verið á kauphliðinni og svo eru það spákaupmennirnir sem eru vaknaðir til lífsins eftir harða útreið í september," segir í markaðsfréttunum.

„Á stutta endanum eru erlendir fjárfestar (sem sitja fastir) allsráðandi. Það er því töluverð eftirspurn í gangi sem hefur í fátt að leita sem stendur þar sem gjaldeyrishöftin koma í veg fyrir flæði úr krónunni.

Á framboðshliðinni eru það Íbúðalánasjóður og ríkissjóður sem sjá markaðinum fyrir bréfum. Verðtryggt framboð skuldabréfa er frekar takmarkað þar sem lítið er um útlán hjá Íbúðalánasjóði en viðvarandi halli ríkissjóðs sér þó um að töluvert framboð verður af óverðtryggðum bréfum næstu misserin."