Greining: Verðbólgan minnkar í 4,1% í september

Greining Íslandsbanka spáir því að vísitala neysluverðs (VNV) hækki í september um 0,4% frá ágústmánuði. Ef spáin gengur eftir mun ársverðbólgan hjaðna úr 4,5% í 4,1% í september, en svo lítil hefur verðbólgan ekki verið frá ofanverðu sumri árið 2007.

Fjallað er um málið í Morgunkorni greiningarinnar. Þar segir að útsöluáhrif spili hér töluvert hlutverk líkt og jafnan í septembermánuði. Til að mynda gerir greiningin ráð fyrir að hækkun á fötum og skóm leiði til 0,4% hækkunar vísitölunnar nú.

Á móti vegur að styrking krónunnar frá miðju ári hefur áhrif til lækkunar á ýmsum innfluttum vörum og dregur úr hækkunarþrýstingi á öðrum innfluttum sem innlendum vörum. Einnig bendir ýmislegt til þess að húsnæðisliður vísitölunnar muni lækka lítillega í septembermánuði.

„Þegar líður á haustið gerum við ráð fyrir nokkurri hækkun VNV. Þar vegur hvað þyngst veruleg gjaldskrárhækkun OR á heitu vatni og rafmagni, en fyrirtækið sér u.þ.b. 60% landsmanna fyrir orku til heimilisnota. Auk beinna áhrifa af hækkuninni má búast við að aðrir orkusalar sláist í hópinn með hækkanir, auk þess sem aukinn orkukostnaður innlendra fyrirtækja mun í talsverðum mæli velta út í verð vöru þeirra og þjónustu," segir í Morgunkorninu.

„Alls spáum við því að VNV hækki um 2,1% fram til áramóta. Þrátt fyrir það mun verðbólga halda áfram að hjaðna, enda detta í mánuði hverjum miklir verðbólgu-mánuðir út úr 12 mánaða taktinum það sem eftir lifir árs. Gerum við ráð fyrir því að verðbólga mælist 3,4% í desember. Eftir sem áður áætlum við svo að verðbólga mælist að jafnaði nálægt verðbólgumarkmiði Seðlabankans á næsta ári, og spáum við meðalverðbólgu upp á 3,2% árið 2011."

Greiningin segir að líkt og fyrri daginn er gengisþróun krónu stærsti áhættuþáttur spárinnar. „Gerum við þar ráð fyrir að krónan verði á svipuðum slóðum og nú er raunin, en óþarfi ætti að vera að taka fram að ekki er á vísan að róa í þeim efnum. Þá styttist í kjarasamninga á stærstum hluta vinnumarkaðar og gætu launakröfur í þeim orðið talsvert hærri en innlend fyrirtæki standa undir án verðhækkunar á vörum og þjónustu.

Þróun fasteignaverðs mun á hinn bóginn halda aftur af hækkun vísitölunnar að mati okkar, þótt að líklegt sé að verð íbúðarhúsnæðis sé nú nálægt botninum í þessari kreppu. Einnig lítur nú út fyrir að hækkun skatta á vörur og þjónustu muni reynast fremur hóflegri næsta kastið en útlit var fyrir í upphafi þessa árs," segir í Morgunkorninu.