Bónus með lægsta verðið

Bónus var oftast með lægsta verðið og Kostur oftast með hæsta verðið í nýrri verðkönnun sem verðlagseftirlit ASÍ gerði í fjórum lágvöruverðsverslunum á höfuðborgarsvæðinu og Akureyri á mánudaginn.

Af 55 vörutegundum sem skoðaðar voru, var Bónus með lægsta verðið í 34 tilvikum en oft reyndist lítill verðmunur vera á milli verslunar Bónus og Krónunnar. Af þeim 48 vörutegundum sem fáanlegar eru í báðum verslunum var einnar krónu verðmunur í 20 tilvikum, tveggja krónu munur í 3 tilvikum og sama verð í 2 tilvikum. Kostur var með hæsta verðið í 27 tilvikum.

Mesti verðmunurinn í könnuninni var á ódýrustu fáanlegu Basmalti grjónunum sem kostuðu 298 kr./kg í Bónus en voru dýrust í Nettó á 678 kr./kg sem er 128% verðmunur. Má sjá verðmun um og yfir 100% í fleiri tilvikum t.d. Head&Shoulder´s, nammibar, Nescafé gull, sveskjusultu og Kjarna kókosolíu. Minnstur verðmunur í könnunni var á Cadbury´s kakói sem kostaði 298 kr. í Bónus og Nettó en krónu meira hjá Krónunni.

Könnunin var gerð á sama tíma í eftirtöldum verslunum: Bónus Holtagörðum, Krónunni Granda, Nettó Akureyri og Kosti Kópavogi.