Það kostar Breta 8 milljónir að eignast barnabarn

Það kostar skildinginn að ala upp barn. En nú hefur það líka komið í ljós að það er líka rándýrt að eignast barnabarn.

Bresk rannsókn, sem sagt er frá í Daily mail, sýnir að ömmur og afar verja að meðaltali 50 þúsund sterlingspundum eftir fæðingu fyrsta barnabarnsins, meðal annars við að hjálpa foreldrum þess að fást við uppeldið. Upphæðin nemur tæpum 9 milljónum íslenskra króna. Í sumum tilfellum getur upphæðin farið upp í allt að 121 þúsund sterlingspund, eða 21 milljón króna. Ömmur og afar sneiða oft framhjá lífsins lystisemdum eða kafa ofan í ævisparnað sinn til þess að hafa efni á að aðstoða börnin sín við að ala upp erfingja.

Rannsóknin sýnir að þriðjungur af ömmum og öfum hefur aðstoðað börnin sín við að kaupa bíl og aðstoðað við rekstur hans, fjórir af hverjum tíu hafa hjálpað til við að greiða af skuldum barna sinna og þriðjungur hefur aðstoðað börnin sín fjárhagslega við að koma húsnæði sínu í skikkanlegt horf.