Íslandsbanki vísar ásökunum um þvinganir á bug

Íslandsbanki vísar á bug ásökunum framkvæmdastjóra Capacent í fjölmiðlum þess efnis að bankinn hafi þvingað starfsmenn félagsins til þess að taka yfir rekstur þess og skipta um kennitölu. Eins og fram hefur komið í fjölmiðlum hefur bankinn átt í viðræðum við félagið síðustu misseri vegna slæmrar skuldastöðu þess.

Í yfirlýsingu frá Íslandsbanka segir að bankinn starfi eftir sameiginlegum verklagslagsreglum Samtaka Fjármálafyrirtækja sem byggi á 3. grein laga nr. 107/2009. Reglunum sé ætlað að tryggja sem best jafnræði og samræmd vinnubrögð í meðferð skuldamála fyrirtækja.

„Í síðustu viku varð ljóst að þær hugmyndir sem stjórnendur félagsins höfðu um lausn málsins rúmuðust ekki innan þess vinnuramma sem bankanum ber að starfa eftir. Það var því skoðun bankans að eina færa leiðin í stöðunni væri að gefa félagið upp til skiptameðferðar og að eignir þess yrðu seldar hæstbjóðanda í gagnsæju söluferli hjá skiptastjóra. Eigendur og stjórnendur félagsins kusu hinsvegar sjálfir að fara aðra leið," segir í yfirlýsingu frá Íslandsbanka.