Háu hælarnir þvældust fyrir Angelinu

Kvikmyndin The Tourist, með Angelinu Jolie og Johnny Depp í aðalhlutverkum, verður frumsýnd innan skamms og hafa leikararnir verið duglegir við að kynna myndina með því að veita viðtöl.

Í viðtali við vefritið Pop Sugar segist Jolie hafa átt í erfiðleikum með að túlka kvenleika persónu sinnar.

„Búningahönnuður kvikmyndarinnar vildi að persóna mín væri kynþokkafull og fáguð en einnig skemmtileg og lífsglöð. Það tók mig smá stund að venjast hælunum og hönskunum sem ég þurfti að klæðast, ég held það viti allir nú orðið að ég er ekkert sérstaklega kvenleg alltaf. Þetta voru því mikil viðbrigði fyrir mig, sérstaklega eftir að hafa verið nýbúin að leika í kvikmyndinni Salt, þar sem ég var allt annað en kvenleg," sagði leikkonan.

Hún sótti innblásturinn fyrir persónuna á ólíklegasta stað, til eins árs gamallar dóttur sinnar, Vivienne.

„Yngsta dóttir mín, Vivienne, er mjög stelpuleg í eðli sínu og ég ákvað að leika fullorðna útgáfu af henni."