Skuldir sjávarútvegsins á við fjórðung af landsframleiðslu

Skuldir sjávarútvegsfyrirtækja hjá stóru bönkunum þremur og Byggðastofnun nema rúmlega 400 milljörðum króna sem svarar til um fjórðungs af landsframleiðslu Íslands.

Þetta kemur fram í svari efnahags- og viðskiptaráðherra við fyrirspurn á Alþingi frá Ólínu Þorvarðardóttur þingmanni Samfylkingarinnar.

Í svarinu segir að þessi fjárhæð tekur mið af skuldunum sjálfum en ekki bókfærðu virði þeirra hjá fjármálafyrirtækjunum, það er hve mikið þau telja að afskrifa þurfi af þessum skuldum.

Fram kemur í svarinu að bankarnir þrír, Arion banki, Nýi Landsbankinn og Íslandsbanki auk Byggðastofnunnar hafi hingað til afskrifað rúma 6,4 milljarða króna af þessum skuldum.

Ólína spurði meðal annars hve mikið af þessum skuldum hefðu verið frystar. Í svarinu segir að samkvæmt nýrri úttekt Fjármálaeftirlitsins væru skuldir upp á 137 milljarða króna í frystingu. Hinsvegar eru bankarnir og Byggðastofnun með mismundandi skilgreiningar á því hvað felist í lánafrystingu og ber því að taka þessa upphæð með fyrirvara.