Raungengi krónunnar heldur áfram að hækka

Raungengi íslensku krónunnar hækkaði um 0,9% í september síðastliðnum á mælikvarða hlutfallslegs verðlags. Raungengið hefur hækkað samfellt milli mánaða, að júlí undanskildum, síðan í nóvember á síðasta ári og endurspeglar það hækkun nafngengis krónunnar á þeim tíma.

Fjallað er um málið í Morgunkorni greiningar Íslandsbanka. Þar segir að gildi raungengisins á ofangreindan mælikvarða er nú komið í 77,3 stig sem er það hæsta sem það hefur verið síðan í mars á síðasta ári. Það sem af er ári nemur hækkunin 14,3%.

Þrátt fyrir þessa miklu hækkun er raungengið enn lágt í sögulegu samhengi, eða ríflega fimmtungi undir langtímameðaltali sínu. Þetta kemur fram í tölum sem Seðlabanki Íslands birti í gær.

Þessi þróun er í samræmi við hækkun á nafngengi krónunnar á sama tímabili en nafngengi krónunnar var 1,1% hærra í september en í ágúst. Á hinn bóginn stóð vísitala neysluverðs í stað á sama tíma og var verðbólgan hér á landi minni en hún var í okkar helstu nágrannalöndum í mánuðinum.

Líklega mun raungengið hækka enn frekar þegar fram líða stundir og eru rökin fyrir því m.a. að það er enn langt undir langtímameðaltali sínu og að okkar mati nokkuð undir því raungengi sem tryggir jafnvægi á utanríkisviðskiptum þjóðarbúsins. Hversu mikil sú hækkun verður, að hve miklu leyti hækkunin mun eiga sér rót í hækkun á innlendu verðlagi og launum, og hversu langan tíma það tekur að ná því gengi sem tryggir umrætt jafnvægi er hins vegar ómögulegt að segja til um, að því er segir í Morgunkorninu.