Kuyt ætlar að reyna að ná Evrópuleiknum á móti sínu gamla liði

Dirk Kuyt er ákveðinn í því að ná að spila Evrópuleikinn á móti sínum gömlu felögum í FC Utrecht en leikurinn fer fram í Hollandi 30. september. Kuyt meiddist illa á öxl á æfingu hollenska landsliðsins og átti af þeim sökum að vera frá í fjórar vikur.

„Ég vona að ég nái Utrecht-leiknum en þetta fer allt eftir því hvernig batinn gengur fyrstu dagana," sagði Dirk Kuyt við heimasíðu Liverpool en hann meiddi sig á mánudaginn þegar hann datt illa eftir að hafa reynt hjólhestaspyrnu á æfingu.

Dirk Kuyt hefur verið fastamaður hjá bæði Liverpool og hollenska landsliðinu og skoraði meðal annars eitt mark í 5-0 sigri Hollendinga á San Marínó á föstudaginn.