Rekstur Kópavogsbæjar skilaði hálfum milljarði í afgang

Rekstur Kópavogsbæjar skilaði rúmlega 500 milljóna kr. afgangi á fyrstu sex mánuðum ársins. Þetta kemur fram í óendurskoðuðu og ókönnuðu uppgjör Kópavogsbæjar fyrir fyrstu sex mánuði ársins 2010 sem sent hefur verið til Kauphallarinnar.

Í tilkynningunni segir að aðalfrávikið frá áætlun liggur í fjármagnsliðum. Er þar aðallega um að ræða reiknaðan gengishagnað vegna erlendra lána, sem er um 1.200 milljónir kr., reiknaðar verðbætur sem urðu heldur meiri en áætlað var á fyrri árshelmingi og markaðsvexti sem reyndust hærri en áætlað var.

Samkvæmt uppgjörinu eru heildartekjur heldur lægri en áætlað hafði verið en þær hafa verið að sveiflast í kringum áætlun það sem af er ári. Laun eru heldur hærri, annarsvegar vegna meiri þunga á fyrri hluta árs, en einnig vegna hækkunar á tryggingargjaldi. Annar rekstrarkostnaður er nánast á pari við áætlun.

Afkoma samstæðu fyrir fjármagnsliði og afskriftir nemur alls 1.285 milljónum kr. en í áætlun var gert ráð fyrir 1.507 milljónum kr. Rekstrarniðurstaða er hinsvegar 508,4 milljónir kr. en áætlað var að hún yrði 21,8 milljón kr. miðað við hálft ár.

„Þrátt fyrir erfiðar aðstæður í samfélaginu og með hliðsjón af samfélagslegum skyldum bæjarfélagsins, einkum þegar hart er í ári, hefur almennur rekstur bæjarsjóðs í stórum dráttum verið í takti við áætlun, sem unnin var í lok síðasta árs," segir í tilkynningunni.