Míla og SIP skrifa undir samning

Nýlega skrifuðu Fjarskiptafyrirtækið SIP ehf. og Míla ehf. undir samning um sambönd í tveimur símstöðvum í Mývatnssveit.

Samböndin verða notuð til að veita ADSL þjónustu á svæðinu, sem SIP hefur hug á að bjóða, en fyrir voru ekki sambönd fyrir ADSL þjónustu í viðkomandi símstöðvum.

Brjánn Jónsson framkvæmdastjóri SIP skrifaði undir samninginn fyrir hönd SIP og fyrir hönd Mílu var það Eva Magnúsdóttir forstöðumaður Sölu sem skrifaði undir.

„Verkefnið á Mývatni er á margan hátt afar skemmtilegt og jákvætt. Frumkvæðið kemur frá heimamönnum og hefur SIP tekist í samstarfi við Mílu, að útfæra þjónustu sem mun ná til allra íbúa sveitarfélagsins. SIP ehf. bindur miklar vonir við aukið samstarf við Mílu en sjálfstæði Mílu er afar mikilvægur hlekkur í því að auka samkeppni á fjarskiptamarkaðnum, " segir Brjánn Jónsson framkvæmdastjóri SIP.

„Míla er mjög ánægð með það samstarf sem fyrirtækið hefur átt við SIP og bindur vonir við að framhald verði á því, "segir Eva Magnúsdóttir, forstöðumaður Sölu hjá Mílu.