Þýskir kröfuhafar fengu leið á ríkinu

„Þetta hefur vissulega neikvæð áhrif á lífeyrissjóðina. En við byrjuðum að færa niður kröfur okkar á sparisjóðina árið 2008 og höfum gert það reglulega síðan þá,“ segir Gylfi Jónasson, framkvæmdastjóri Festa lífeyrissjóðs, um yfirtöku ríkisins á Sparisjóði Keflavíkur og Byr í gærnótt. Hann segir niðurfærsluna þegar komna fram í ársreikningi.

Talið er að LSSR, Gildi og Lífeyrissjóður verzlunarmanna tapi á bilinu sex til átta milljörðum króna á yfirtöku ríkisins á sparisjóðunum tveimur.

Forsvarsmenn sparisjóðanna beggja skiluðu starfsleyfum þeirra til Fjármálaeftirlitsins í fyrrakvöld og tók ríkið þá yfir í kjölfarið. Þetta eru stærstu sparisjóðir landsins og hefur verið unnið að fjárhagslegri endurskipulagningu þeirra síðan í fyrravor. Ráðamenn hafa talað þannig um sparisjóðina að stutt hafi verið í að ríkið legði þeim báðum til eiginfjárframlag sem miðaði að því að reisa þá við. Báðir sparisjóðirnir áttu að mynda hryggjarstykkið í endurreisn sparisjóðakerfisins. Óvíst er með næstu skref.

Kröfuhafar sparisjóðanna höfðu frest út þessa viku til að taka samkomulagi ríkisins sem leiða átti til eiginfjárframlags úr ríkissjóði. Viðbúið var að ríkið myndi leggja Byr til um ellefu milljarða króna miðað við eiginfjárstöðu hans í árslok 2007.

Kröfuhafar sparisjóðanna höfðu flestir samþykkt að færa kröfur sínar á hendur sparisjóðunum báðum verulega niður, eða í kringum sextíu prósent, síðasta haust. Eftir því sem næst verður komist mun hafa á þá hallað í flestum tilboðum hins opinbera eftir það og áttu kröfuhafar að fá undir þrjátíu prósentum um áramótin. Þetta sættu þýsku kröfuhafarnir sig ekki við, ekki síst Bayerische Landesbank, sem hefur tapað háum fjárhæðum á viðskiptum sínum hér. Því hafi hann ákveðið að taka ekki tilboði ríkisins.

Eignir sparisjóðanna hafa verið settar inn í nýtt félag sem heyrir undir Bankasýslu ríkisins og situr ekkert eftir í gömlu sparisjóðunum annað en kröfur lánardrottna. Ríkið, sem tryggir allar innstæður, mun leggja hvorum þeirra til fimm milljarða evra, jafnvirði 860 milljóna króna, í samræmi við Evróputilskipanir um fjármálafyrirtæki. Gylfi Magnússon, efnahags- og viðskiptaráðherra, segir viðbúið að sú fjárhæð hrökkvi skammt.

„Þetta á ekki að verða mikil byrði fyrir skattgreiðendur. Við vonumst til að endurheimta það, svo sem með sölu eigna,“ segir hann. jonab@frettabladid.is