Skel Investments keypti 49% hlutinn í Skeljungi

Í tilkynningu segir að söluferlið var opið öllum áhugasömum fjárfestum sem uppfylltu skilyrði til þess að geta talist fagfjárfestar samkvæmt lögum um verðbréfaviðskipti, auk þess sem skilyrði var sett um verulegan fjárhagslegan styrk og viðeigandi þekkingu. Samtals skiluðu tuttugu aðilar inn trúnaðaryfirlýsingum og fengu afhent kynningargögn um félögin.

Þrjú skuldbindandi tilboð bárust í félagið með fyrirvara um áreiðanleikakönnun. Tilboð voru opnuð þann 7. apríl sl. í viðurvist óháðs eftirlitsaðila sem vottaði efnisinnihald þeirra.

Með sölunni lýkur endurskipulagningu Skeljungs sem staðið hefur yfir um nokkurt skeið og vænta meirihlutaeigendur félagsins og Íslandsbanki áframhaldandi góðs samstarfs. Mikið starf hefur verið unnið innan Skeljungs á undanförnum misserum sem miðar að því að styrkja reksturinn. Fyrirtækjaráðgjöf Íslandsbanka hafði umsjón með söluferlinu fyrir Miðengi ehf.

,,Ég er ánægð með þessa niðurstöðu. Eins og mörg önnur íslensk fyrirtæki var Skeljungur orðið yfirskuldsett félag og endurskipulagning með aðkomu banka þörf. Í samstarfi við Íslandsbanka, hafa eigendur og stjórn félagsins lokið mikilvægum áfanga í enduruppbyggingu félagsins. Áframhaldandi uppbyggingarstarf hvílir á herðum starfsfólks Skeljungs, sem hefur sýnt mikla þolinmæði, traust og dugnað á erfiðum tímum. Það er ætlun okkar allra að styrkja félagið enn frekar og efla í samkeppni þannig að viðskiptavinir okkar njóti góðs af," segir Svana Nanna Vigfúsdóttir, hluthafi í Skel Investments ehf.

,,Þessi sala er í takt við það markmið Miðengis og Íslandsbanka að selja þær eignir sem færðar eru inn í eignarhaldsfélagið í opnu og gagnsæu ferli. Íslandsbanki og Miðengi hafa verið í fararbroddi í þeim efnum á undanförnum 20 mánuðum og við ætlum að halda áfram á þeirri braut,"segir Ólafur Þór Jóhannesson, framkvæmdastjóri Miðengis ehf.

Viðskiptin eru gerð með fyrirvara um samþykki Samkeppniseftirlitsins.