Landsbankinn eignast Björgun að fullu

Landsbankinn hefur eignast allt hlutafé í verktakafyrirtækinu Björgun ehf.. Í tilkynningu frá bankanum segir að Björgun hafi verið í eigu Renewable Energy Resources ehf., dótturfyrirtækis Atorku Group hf., en í tengslum við skuldauppgjör RER hefur bankinn leyst til sín þau veð sem bankinn átti í eigum félagsins.

Þá segir að bankinn hafi þegar fengið undanþágu til samruna bankans og Björgunar ehf. hjá Samkeppniseftirlitinu. „Áætlað er að Landsbankinn muni selja Björgun í opnu söluferli innan 6 mánaða og verður fyrirkomulag þess kynnt þegar nær dregur. Fyrirtækjaráðgjöf Landsbankans mun annast söluna."

Í tilkynningunni segir ennfremur að Björgun ehf. sé gamalgróið fyrirtæki, stofnað 1952 og er þekktast fyrir efnisnám úr sjó og er stærsti framleiðandi jarðefna til mannvirkjagerðar á Íslandi auk þess að annast framkvæmdir við dýpkun hafna. Þá hefur félagið verið í fremstu röð í uppbyggingu bryggju- og strandhverfa hér á landi.

Um 35 manns starfa hjá Björgun og eru engar breytingar á rekstri félagsins fyrirhugaðar enda er rekstur Björgunar ehf. í jafnvægi. Landsbankinn mun skipa Björgun ehf. nýja stjórn til skamms tíma. Framkvæmdastjóri er Gunnlaugur Kristjánsson.