Mikill munur á mælingum á skuldatryggingaálagi

Í Morgunkorni greiningar Íslandsbanka segir að skuldatryggingaálag ríkissjóðs Íslands hefur hækkað nokkuð allra síðustu daga. Nú rétt undir hádegi stóð álagið til 5 ára í 401 punktum (4,01%) en síðastliðinn föstudag stóð það í 370 punktum.

„Eins og kunnugt er hefur áhættuálagið á ríkissjóð lækkað nær stöðugt frá því í byrjun febrúar síðastliðins þegar það náði 675 punktum, og hefur það haldist undir 400 punktum síðustu vikurnar. Telja má líklegt að hækkunin að þessu sinni sé aðeins tímabundin og komi til með að ganga til baka," segir í Morgunkorninu.

„Má hér benda á að verulega hefur ræst úr erlendri lausafjárstöðu ríkissjóðs vegna endurnýjunar fjármögnunar frá Alþjóðagjaldeyrissjóðnum og Norðurlöndunum. Þetta leiddi m.a. til þess að matsfyrirtækið Moody´s breytti horfum um lánshæfiseinkunnir ríkissjóðs síðastliðinn föstudag úr neikvæðum í stöðugar.

Þrátt fyrir að ekki sé hægt að útiloka áhrif eldgossins í Eyjafjallajökli til hækkunar á áhættuálaginu þá virðist líklegt að þessi hækkun tengist ekki sérstökum innlendum þáttum heldur komi í kjölfar aukinnar áhættufælni á mörkuðum, enda hefur álagið á mörg önnur ríki Evrópu verið að hækka á sama tíma.

Augljóslega er hér meðal annars átt við áhættuálagið á ríkissjóð Grikklands enda fer nú óðum að líða að því að gríska ríkið þurfi að reiða fram 9 ma. evra til þess að greiða af skuldabréfum sem eru á gjalddaga 19 maí. Er enn veruleg óvissa uppi um hvort að Grikkir komi til með að geta greitt af lánum sínum. Nú rétt undir hádegi var áhættuálagið á gríska ríkið til 5 ára komið í 764 punkta.

Þessi mikla óvissa um fjárhagslega stöðu gríska ríkisins hefur svo aftur smitað út frá sér og þá sérstaklega til annarra evruríkja sem einnig glíma við mikinn halla á opinberum fjármálum, svo sem Írlands, Spánar og svo ekki sé talað um Portúgal. Þannig var áhættuálagið á portúgalska ríkið 115 punktar um miðjan mars en nú í morgun stóð áhættuálagið í 349 punktum. Á sama tíma hefur áhættuálagið á írska ríkið hækkað úr 116 punktum í 228 punkta og á hið spænska úr 94 punktum í 204 punkta."

Hér má bæta því við að þrátt fyrir þessa hækkun hjá CMA er Ísland dottið niður í 9. sæti á lista CMA yfir þær 10 þjóðir sem taldar eru í mestri hættu á þjóðargjaldþroti. Ísland vermdi lengi 5. sæti listans eftir bankahrunið haustið 2008 en hefur síðan fikrað sig niður listann.