Heimamaðurinn Alugersuari fljótastur á Spáni

Spænski ökumaðurinn Jamie Alguersuari á Torro Rosso var fljótastur allra á Jerez brautinni í dag, þar sem væta gerði vart við sig annað slagið. Alguersuari er aðeins 19 ára gamall og með nýjan samning við liðið sem hann byrjaði með í fyrra.

Landi hans Pedro de la Rosa á Sauber Ferrari varð annar 0.817 sekúndum á eftir Alguersuari. Adrian Sutil á Force India lenti í basli með bíl sinn um tíma. Mikill munur var á aksturstímum manna og má um kenna veðrinu á staðnum.

Felipe Massa stýrði Ferrari bílnum og var 0.2 sekúndum frá tíma Fernando Alonso frá fyrr í vikunni. Massa ók 72 hringi og varð á undan Sebastian Vettel á Red Bull. Bretinn Lewis Hamilton varð næst síðastur allra ökumanna á Mclaren og er talið að hann hafi ekið með mikið bensín á æfingunni.