Fær enn hundruð milljóna fyrir að reka eignir Straums

Novator, félag Björgólfs Thors Björgólfssonar, fær enn hundruð milljóna króna umsýsluþóknun árlega fyrir að reka eignir Straums Burðaráss, sem í slitameðferð.

Um er að ræða sjóðinn Novator One, en Straumur setti fyrst peninga í sjóðinn í maí 2005. Heimildir herma að Straumur hafi sett alls um 200 milljónir evra í sjóðinn, en það jafngildir þrjátíu og einum milljarði króna.

Heimildarmenn fréttastofu sem gagnrýna þetta fyrirkomulag segja að um útvistun hafi verið að ræða. Straumur hafi þannig fært hluta af efnahagsreikningi sínum til Novators sem reiknaði sér tekjur af eignunum og gerir í raun enn. Þess má geta að á annað hundrað starfsmenn unnu hjá Straumi á þessum tíma, árunum fyrir hrun, en margir hverjir voru sérfræðingar í markaðsviðskiptum, umbreytingu fyrirtækja o.fl.

Aldrei hefur verið upplýst hversu mikið hefur verið greitt út úr Novator One sjóðnum til Novators. Þá liggur ekki fyrir hversu mikið Straumur greiðir Novator mikið árlega í umsýsluþóknun. Fréttastofa óskaði í dag eftir upplýsingum um umsýsluþóknunina hjá Ragnhildi Sverrisdóttur, talsmanni Novators. Hún staðfesti að Novator fengi slíka þóknun, en vildi ekki gefa hana upp. Miðað við eignastöðu sjóðsins hljóp þóknunin á hundruðum milljóna króna árlega, og gerir í raun enn, en samkvæmt glærukynningu frá Novator sem fréttastofa hefur undir höndum var umsýslugjald 2 prósent, greitt út 1. febrúar ár hvert. Samkvæmt samkomulaginu átti Novator einnig að fá 20 prósent af hagnaðinum.

„Það er rétt að Straumur er eini fjárfestirinn í Novator One. Straumur fjárfesti í Novator One í maí 2005, en á þeim tíma áttu Björgólfur Thor og Novator aðeins lítinn hlut í Straumi, áttu ekki fulltrúa í stjórn og komu ekki á neinn hátt að rekstri bankans," segir Ragnhildur. Hún segir að sú þóknun sem Novator fái fyrir að stýra eignunum tíðkist hjá öllum öðrum verðbréfa- og fjárfestingasjóðum heims. „Slík þóknun stendur undir rekstri, launum starfsfólksins sem eignunum stýrir og öðrum álíka kostnaði. Ef vel gengur getur eignastýring, sem önnur atvinnustarfssemi, skilað hagnaði," segir Ragnhildur.

Óttar Pálsson, forstjóri Straums, sagðist í samtali við fréttastofu í dag ekki vilja gefa upp hvað Novator fengi greitt í umsýsluþóknun vegna Novator One. Aðspurður hvort kröfuhafar Straums hefðu gert athugasemdir við það að fyrrverandi hluthafi bankans fengi umsýsluþóknun fyrir að stýra eignum hans sagðist Óttar ekki vita til þess að neinn kröfuhafi Straums hafi gert athugasemdir við þetta fyrirkomulag. Óttar sagði hins vegar að Straumur væri bundinn af gerðum samningum, þessir samningar hafi verið gerðir og félagið væri bundið af þeim. Óttar sagði að ekkert óeðlilegt væri við viðskipti Straums við fyrrverandi eiganda sinn, Björgólf Thor Björgólfsson.