Seðlabankinn mótmælir afstöðu slitastjórnar

Seðlabanki Íslands hefur andmælt afstöðu slitastjórnar Icebank til krafna upp á yfir 200 milljarða króna en nú tekur við formlegt sáttarferli í málinu. Náist ekki að semja verður málinu vísað til dómstóla.

Slitastjórn Sparisjóðabanka Íslands hefur hafnað ríflega tvö hundruð milljarða króna kröfu Seðlabanka Íslands í þrotabú sparisjóðsins. Seðlabankinn lánaði sparisjóðabankanum háar fjárhæðir í endurhverfum viðskiptum í aðdraganda bankahrunsins.

Sparisjóðabankinn lánaði síðan áfram til viðskiptabankanna þriggja, sem voru í miklum vandræðum vegna lausafjárskorts. Slitastjórnin telur að um málamyndagjörning hafi verið að ræða. Auk þess telur slitastjórnin að lánin hafi verið andstæð lögum um Seðlabanka Íslands og brot á vinnureglum bankans.

Kröfurnar nema samtals 215 milljörðum en eigandi þeirra er Eignasafn Seðlabanka Íslands. Seðlabankinn hefur andmælt afstöðu slitastjórnar, en nú tekur við formlegt sáttaferli þar sem seðlabankinn mun koma sínum rökum og sjónarmiðum á framfæri við slitastjórnina. Ef ekki tekst að jafna ágreininginn vísar slitastjórnin málinu til dómstóla. Einn sáttafundur hefur þegar verið haldinn og eru fleiri fundir fyrirhugaðir á næstu vikum.