Starfsmannastjórar sérfræðingar í innflytjendalöggjöf

Á sumum sviðum í íslensku atvinnulífi er svo mikill skortur á starfsfólki að starfsmannastjórar eru orðnir sérfræðingar í innflytjendalöggjöf og að taka á móti fólki inn í landið. Þetta segir Orri Hauksson, framkvæmdastjóri Samtaka iðnaðarins.

Orri sagði í þættinum Sprengisandi á Bylgjunni í morgun að vissulega sé víða atvinnuleysi á vinnumarkaði, einkum i mannvirkjagerð. Til dæmis hafi Ístak þurft að segja upp 800 starfsmönnum á undanförnum misserum. Hins vegar séu nokkrar greinar sem blómstri nú sem aldrei fyrr.

„Leikjaframleiðendur hafa varla undan að ráð. Þeirra starfsmannastjórar eru orðnir sérfræðingar í innflytjendalöggjöf og því hvernig hægt er að fá fólk inn í landið. Þannig að sumstaðar vantar sérhæft fólk inn í landið á meðan að annarsstaðar gengur það laust," segir Orri. Hann segir að verulegur skortur sé á fólki með tæknimenntun í landinu og nefnir málmtækni sem dæmi. Einnig sé skortur á fólki með bóklegt tækninám að baki, svo sem verkfræðingum og tölvufræðingum.

Orri segir að verkefnið hjá hinu opinbera, samtökum í atvinnulífinu og verkalýðshreyfingunni á næstunni sé að brúa það gap sem sé á milli framboðs á vinnuafli á sumum sviðum í atvinnulifi og eftirspurnar annarsstaðar í atvinnulífinu.