Gjaldeyrisforðinn styrkist vegna sölunnar á FIH

Búast má við að gjaldeyrisforði Seðlabankans verði kominn í 600 milljarða króna um áramótin, en forðinn styrkist vegna sölu á danska FIH bankanum. Seðlabankastjóri segir að styrking forðans hafi jákvæð áhrif á gengi krónunnar.

Eins og greint var frá í gær hefur verið gengið frá sölu á danska bankanum FIH. Kaupendurnir eru tveir danskir lífeyrissjóðir og sænskt tryggingafélag og fjárfestingasjóður. Söluverð er 670 milljónir evra, eða sem nemur 103 milljörðum króna.

Bankinn var veðsettur Seðlabanka Íslands vegna 500 milljóna evra láns sem Seðlabankinn veitti Kaupþingi í hruninu haustið 2008. Danski bankinn var á forræði skilanefndar Kaupþings.

Tæpir 40 milljarðar króna verða staðgreiddir en hitt greiðist á næstu fjórum árum, en hvort kaupverðið skilar sér að fullu fer eftir þróun á eignum bankans. Ágætis líkur eru því á að Seðlabankinn endurheimti að fullu það lán sem hann veitti Kaupþingi fyrir tveimur árum.

Ekki liggur enn fyrir hve mikið kemur inn í þrotabú Kaupþings vegna sölunnar, en það fer eftir framtíðarverðmæti bankans. Ef kaupverðið verður greitt að fullu má gera ráð fyrir að um 26 milljarðar króna endurheimtist í þrotabú Kaupþings, þegar búið verður að greiða 77 milljarða króna lánið frá Seðlabankanum.

Salan stækkar gjaldeyrisforða Seðlabankans um sem nemur 250 milljónum evra í kringum áramótin. Búast má við að gjaldeyrisforðinn verði kominn upp í rúma 600 milljarða í byrjun næsta árs.

Sterkur gjaldeyrisforði er eitt af undirstöðuatriðunum í efnahagsáætlun Íslands og Alþjóðagjaldeyrissjóðsins. Rökin fyrir mikilvægi þess að hafa stóran gjaldeyrisforða, eru að hluta til þau að það auki trúverðugleika Íslands út á við og styðji við gengi krónunnar.

Heimir Már Pétursson, fréttamaður, spurði Má Guðmundsson seðlabankastjóra um áhrif sölunnar á FIH á gengi krónunnar í gær.

Seðlabanki svaraði því til að hún styrkist ekki beint við það, því viðskiptin fari ekki í gegnum gjaldeyrismarkaðinn beint, en þegar gjaldeyrisforðinn styrkist auki það tiltrú á Íslandi og það gæti því óbeint styrkt krónuna.