Íslensk olíufélög leggja mest á

Álagning á hvern bensínlítra á sjálfsafgreiðslustöðvum íslensku olíufyrirtækjanna er talsvert hærri en gengur og gerist í Danmörku og Svíþjóð. Var meðalálagning til dæmis tvöfalt hærri hérlendis en í Svíþjóð árið 2009.

Samkvæmt tölum frá Félagi íslenskra bifreiðaeigenda, FÍB, var meðalálagning íslensku félaganna 31 króna á hvern lítra í fyrra. Sambærileg upphæð í Svíþjóð var 14 íslenskar krónur, samkvæmt upplýsingum þarlendra olíufélaga. Í Danmörku nam álagning rúmum 20 íslenskum krónum að því er fram kemur á vef samtaka þarlendra olíufélaga en í Noregi var álagningin 28 krónur.

Ástandið virðist hafa breyst til hins betra á þessu ári, en meðaltal fyrstu níu mánaða ársins er komið niður í 28 krónur. Það er með lægra móti þegar litið er til síðustu missera hér á landi og verð framreiknað að núvirði.

Þegar litið er aftur til ársbyrjunar 2008 sýna tölur FÍB að álagning á bensín innan þess tímabils var hæst í nóvember 2008, þegar olíufélögin tóku til sín 41 krónu á hvern lítra. Lægst var álagning á bensínlítrann hins vegar í júní þessa árs þegar rúmar 24 krónur runnu til félaganna.

Varðandi fyrstu níu mánuði þessa árs voru ekki tiltækar tölur frá Noregi, en álagning dönsku félaganna virðist standa í stað og hjá sænsku félögunum hefur álagning hækkað eilítið, eða upp í 17,5 krónur miðað við 28 krónur hér á landi, eins og að ofan greinir.

Hermann Guðmundsson, forstjóri N1, segir þessar tölur geta staðist, en flutningskostnaður sé hærri hér á landi og félögin hér gefi öll afslætti ofan á listaverð.

„Nettóálagning okkar er töluvert lægri þegar dæmið er gert upp. Ég veit ekki hvernig þessu er háttað í Svíþjóð en held að það sé minna um afslætti þar en hér á landi."

Hermann telur að sé það tekið með í reikninginn, verði álagningin svipuð, og það sé í raun óeðlilegt miðað við stærðarmun á mörkuðum hér og í Svíþjóð.

Hann segir aukinn stöðugleika upp á síðkastið leiða til þess að álagning sé nú við lægstu mörk.

„Við í FÍB höfum lengi haft þá skoðun að álagning sé of há hér á landi í samanburði við nágrannalöndin," segir Runólfur Ólafsson, framkvæmdastjóri FÍB. - þj