Villeneuve vill stofna Formúlu 1 lið

Talið er að Formúlu 1 meistarinn frá 1997, Jacques Villeneuve hafi sett inn umsókn til FIA um að mæta með keppnislið á ráslínuna á næsta ári. Villeneuve varð meistari með Williams og reyndi að komast sem ökumaður á ráslínuna á þessu ári. Autosport.com greinir frá því að Villeneuve vilji mæta með lið á næsta ári, en þýska tímaritið Auto Motor und Sport greindi fyrst frá málinu. Í blaðinu segir að Flavio Briatore og Pat Symonds, sem voru áður hjá Renault séu hluti af dæminu. Villeneuve hefur staðfest formlega að hann sé að vinna að Formúlu 1 málum, en ekki nákvæmlega hverju. Ekki er ljóst samkvæmt fréttinni hvort hann hyggst keyra sjálfur, fái lið hans keppnisleyfi, en nokkrir aðilar hafa áhuga á að mæta með lið þar sem eitt pláss er laust fyrir lið 2011. Rick Gorne sem er umboðsmaður Villeneuve sagði á BBC Sport að Formúlu 1 sé möguleiki og þeir séu að vinna að verkefninu. Villeneuve hætti í Formúlu 1 á miðju árinu 2006, þegar hann ók með BMW Sauber.