Hamilton: Á enn möguleika á titlinum

Bretinn Lewis Hamilton telur að hann eigi enn möguleika á meistaratitlinum í Formúlu 1, þó hann sé í fjórða sæti í stigamótinu þegar þremur mótum er ólokið. Keppt verður í Suður Kóreu um næstu helgi, en Brasilíu og Abu Dhabi í nóvember.

"Þetta er að verða erfiðara. Ég geri mér grein fyrir því, en við svona aðstæður þá minnist ég ársins 2007 og við sjáum hvað gerðist í síðustu 2-3 mótunum þá. Ég held að Kimi (Raikkönen) hafi verið 17 stigum á eftir þegar tvö mót voru eftir, en hann varð samt meistari. Ég hef lært oftar en einu sinni að titilinn er ekki kominn í hús fyrr en á síðustu stundu. Ég hef því ekki gefist upp", sagði Hamilton í frétt á autosport.com.

Hamilton gekk heldur illa í síðustu keppni sem var í Japan. Hann fór útaf á fyrstu föstudagsæfingunni og skemmdi bíllinn og tapaði dýrmætum æfingatíma. Svo fékk hann fimm sæta refsingu eftir tímatökuna, þar sem skipta þurfti um gírkassa í bílnum. Í keppninni bilaði svo þriðji gírinn og hann lauk keppni í fimmta sæti. Hann þarf að skipta um gírkassa fyrir næsta mót, en fær ekki refsingu fyrir það eins og í síðustu keppni.

Þrátt fyrir ólán í mótum upp á síðkastið, þá heldur Hamilton í möguleika sína á titlinum.

"Það er jákvætt að ég komst í endamark, náði í stig og hélt lífi í möguleikanum. Við höfum séð hvað titilslagurinn snýst mikið um þolgæði og hvert stig skiptir máli."

"Ég vill sigra á ný og ég fer til Kóreu með þá trú að það geti gerst. Og hver veit, ef það gerist og keppinautarnir nái ekki stigum, þá eykst möguleiki minn á ný", sagði Hamilton.