Staða opinberra lífeyrissjóða neikvæð um 57%

Þettak emur fram á vefsíðu Fjármálaeftirlitsins en eftirlitið beindi þeim tilmælum til lífeyrissjóða að flýta skýrsluskilum vegna tryggingafræðilega athugana, fyrir árið 2009, og voru skýrsluskil dagsett 15. maí sl.

Nú hafa borist skýrslur um tryggingafræðilegar athuganir þeirra 16 lífeyrissjóða sem eru með ábyrgð launagreiðenda. Bráðabirgða niðurstöður sýna að heildar tryggingafræðileg staða þeirra er neikvæð um 57%. Enginn sjóður er með jákvæða stöðu.

Lífeyrissjóðir sem eru með ábyrgð launagreiðenda þurfa ekki að skerða réttindi sjóðfélaga, þrátt fyrir neikvæða tryggingafræðilega stöðu. Þessir sjóðir hafa um langt árabil sýnt neikvæða tryggingafræðilega stöðu og eru flestir á vegum ríkis og sveitarfélaga.

Samkvæmt bráðabirgða niðurstöðum innsendra skýrslna eru flestir sjóðir með jákvæða raunávöxtun fyrir árið 2009. Aðeins 4 sjóðir eru með neikvæða raunávöxtun en þó mismunandi eftir sjóðum. Vegið meðaltal hreinnar raunávöxtunar allra 16 sjóðanna fyrir árið 2009 er nálægt 2,8%.

Fram kemur að verst er staðan hjá Eftirlaunasjóði starfsmanna Útvegsbankans en hún er neikvæð um 99,9% sem þýðir að vart er til króna í þeim sjóði til að mæta skuldbindingum. Best er staðan hjá Lífeyrissjóði starfsmanna sveitarfélaga V deild en hún er neikvæð um 4,1%.