Hulkenberg yfirgefur Williams liðið, en Barrichello verður áfram

Þjóðverjinn Nico Hulkenberg verður ekki áfram hjá Williams liðinu á næsta ári, en liðið vildi gera margra ára samning við kappann. Hulkenberg er með sama umboðsmann og Michael Schumacher hefur verið með, Willy Weber.

Hulkenberg náði besta tíma í tímatökum í Brasilíu og vakti athygli, en Williams er m.a. að skoða að ráða Pastor MacDonaldo sem hefur verið í fremstu röð í GP2 mótaröðinni og er með sterka fjárhagslega bakhjarla á bakvið sig í formi auglýsingaaðila.

"Mér þykir miður að tilkynna þetta og hefði gjarnan viljað vera áfram hjá Williams. Ég þakkaði liðinu fyrir frábærar stundir og óska þeim alls hins besta", sagði Hulkenberg í tilkynningu sem birtist á autosport.com.

Weber segist vera í viðræðum við nokkur lið, en fátt er um spennandi sæti. Reyndar er óljóst hvort Vitaly Petrov verður áfram hjá Renault, en Force India og Lotus gæti verið möguleiki eða Hispania. En Renault er eina liðið sem hægt er að kalla topplið af þessum liðum.

Rubens Barrichello verður áfram hjá liðinu.

"Við réðum Rubens til Wiliams, vitandi það að hann hefur góða tæknilega þekkingu og er ástríðufullur. Hann hefur skilað öllu sem ætlast var af honum og erum ánægðir að geta staðfest samning við hann", sagði Frank Williams í tilkynningu frá liðinu.