Greining spáir 0,5 prósentustiga vaxtalækkun

Fjallað er um málið í Morgunkorni greiningar Íslandsbanka. Þar segir að eftir síðustu vaxtaákvörðun lýsti nefndin því yfir að eitthvert svigrúm væri enn til staðar til áframhaldandi slökunar peningalegs aðhalds héldist gengi krónunnar stöðugt eða styrktist, og verðbólga hjaðnaði eins og spáð er.

Þessar forsendur standast þar sem viðskiptavegið meðalgengi krónunnar er nú viðlíka því sem það var við síðustu vaxtaákvörðun og verðbólgan hefur haldið áfram að hjaðna í takti við það sem reiknað var með.

„Reiknum við því með að peningastefnunefnd haldi áfram vaxtalækkunarferli sínu og lækki stýrivexti Seðlabankans um 0,50 prósentustig að þessu sinni. Við þetta lækka vextir á viðskiptareikningum innlánsstofnana í 4,25% og vextir á lánum gegn veði í sjö daga í 5,75%," segir í Morgunkorninu.